長洲都有得露營？8個必到西園的理由！

作為一個露營友，一直都憧景可以喺香港每個地方Camp下打下卡，不過有好多地方除咗冒險偷露就冇辦法。今次就為大家介紹一個位於長洲西面嘅營地，園區佔地40萬呎，除咗有大大大大草地做賣點外之外，睇下其他8個必到西園嘅理由！

01｜長洲攪攪新意思

對好多人嚟講，去長洲來來去去都係張保仔洞、東灣同飲飲食食，可能一年去兩次已經好夠皮。位於長洲嘅西園就比咗一個好大嘅理由比大家，成40萬呎地方已經夠大家玩足幾日，主打歷奇冒險更加吸引各位好動一族入場。

西園位於長洲西面，佔地40萬呎

02｜享受舒適露營環境

唔理你係資深露營友定係初心者，有時去到啲熱門營地 (其實冷門營地都會) 比啲密集到令人恐懼嘅營嚇到想走人，再加上成日都見嘅冇公德行為，只可以講句：其實我都係想靜靜地Camp下啫…

西園嘅出現為長洲帶嚟一個優質露營地點，你可以選擇Camping / Glamping唔同玩法，「印第安營」、「南非營」、「蒙古包」同埋大受歡迎嘅「觀星圓拱屋」，部份仲設有水冷空調添！啱哂夏天都仲想露嘅各位。

最受營友歡迎的「觀星圓拱屋」

名副其實的蒙古包

營帳之內設備齊全，部份更設有水冷空調

03｜親親山羊

可能因為山羊唔多怕人又冇乜攻擊性，所以大人細路人都鍾意同羊近距離接觸，西園唔只有羊，更加係用放養方式定時放牧，有時仲可以見識到佢地攀石嘅技術添！

與羊一起露營，是難得的經驗

04｜挑戰自己‧安全歷奇

上面都有講過，西園可以夠大家玩足三日兩夜，當然唔係叫你Hea喺個營咁頹啦，最吸引小弟嘅係佢有唔少歷奇活動，仲相當有挑戰性。好似呢個巨人梯咁，睇住呢對情侶參加者嗰種互相支持互相體諒又冇交嗌，最後成功登頂真係不得不講句好葡萄；另外睇外國行樹頂走廊見得多，原來呢度都有得玩！當然全部歷奇活動都有合資格教練從旁指導，自然玩得安全又放心。

二人合作登上梯頂，講求合作及膽量

設於真樹上的樹頂走廊，是香港獨有

05｜大人細路個個啱玩

咪以為歷奇活動要十歲以上先玩得，小朋友嚟到其實仲有大把嘢玩，遙控船當然個個爭住玩啦；想培養佢地嘅節奏感？由非洲鼓手帶領嘅非洲擊鼓活動就更加唔可以錯過，氣氛絕對係一流。

非洲擊鼓活動，大人小朋友一樣投入

遙控船是小朋友必玩之選

06｜魚菜共生生態教育

除咗玩玩玩成日掛住玩，其實西園仲肩負起推廣生態教育嘅使命，如果想認識有機耕種、循環不息魚菜共生、以及各種可能已經被淡忘嘅農耕知識，喺西園都有專人向你講解，又或者親身參與都得！

魚菜共生源自唐朝，是一項巧妙的前人智慧 (除了魚，原來池塘內也有龜！)

07｜歷史文物「一號界石」就在西園

話說殖民政府於1919年喺長洲豎立起十五支界石，用嚟劃開白人同本地華人嘅居住區域。而多年來遍尋不獲嘅一號界石，終於喺2015年西園復修建設為生態歷奇樂園時比人發現，行山朋友Kill標高柱甚至標距柱之餘一定要Kill埋界石。

一度消失的No.1長洲界石，見證時代變遷

08｜海景處處

平日返工返學捱到肺癆，係放假先可以去露下營，揀地點除咗大草地，最好梗係有埋海景啦。又講返西園呢40萬呎地方，唔計未入園先經過嘅西灣碼頭提供嘅小島休閒Feel，西園仲緊貼住白鰽灣同鯆魚灣，呢一刻我最擔心嘅係太多嘢玩唔夠時間放空望海。

部份營區鄰近海邊，睇一望無際日落十分方便！

留意返如果冇時間去兩日，但又想入園行下都可以買張入場劵($48)入去影下相，不過部份活動均須按價目表收費，如果想玩其他活動最好就早啲Book定啦！

嚟緊佛誕不妨入長洲睇完太平清醮飄色巡遊，再入西園瞓返晚，翌日一起身就可以開始歷奇冒險之旅！

前往方法 (步行 / 單車)：長洲碼頭往右邊直路沿海傍往西灣方向走至盡頭，左轉上「贊端路」。步行約20分鐘、單車約5分鐘。
前往方法 (街渡)：長洲碼頭右旁之公眾碼頭，乘坐「華勝街渡」至「西灣碼頭 ∕ 張保仔洞」(費用約HKD 10元)，由西灣碼頭左接「贊端路」。(船程約 5 分鐘，另加步行約 4 分鐘)